لأن الزواج حاليا اصبح موضوع في مكانه على رف رابع المستحيلات بجوار الصديق الوفي والعنقاء والغول
فالأكيد ان الكثيرين منا توصلوا في لحظة أرشميدسية
نسبة للعالم اليوناني أرشميدس عندما اكتشف قانون الطفو وهو (بيستحمى في البانيو) فصرخ وجدتها
إلى أن الجواز العرفي هو الحل..
والتكلفة محدودة جدا..
ورقة صغيرة منزوعة من كشكول المحاضرات
المليء أصلا بعبارات الحب والهيام وليس بمحاضرات الدكتور عبد المجيد أستاذ التطور الاقتصادى (ده استاذ عندنا ...يعنى ماتخدوش فى بالكم ) + علبتين كانز للصديقين هاني وهيثم اللذين سيكونان الشهود
احنا يا باشا ماشيين قانوني
وكمان كيس شيتوس للصديقة نهى اللي هتطرقع زغرودة في قلب الجامعة عشان نبقى عملنا الإشهار
ولما حد يسألها بتزغرد ليه هتقول له أصل أنا نجحت في امتحانات نص السنة بالرغم إننا لسه في أول نوفمبر
وكمان 30 جنيه ثمن الغرفة الراقية اللي هتأجروها في أنظف فنادق شارع الجلاء عشان تقضوا فيها شهر العسل الذي لن يزيد عن يوم واحد فقط
بعدها ستكتشف البنت أن ما فعلته شيء شنيع جدا
هتصوت وهتلم عليك الناس
وستكون النهاية في القسم إن شاء الله
في السطور القادمة عرض لستة أسباب
عبيطة ولا مؤاخذة
يتخذها البعض ذريعة للزواج العرفي.. ولأنها أسباب عبيطة_____________________________________________ __
_________________________________________
الاستعجال
مافيش وقت خالص
الحياة قصيرة جدا يا جدعان
وهو أكثر الأسباب العبيطة شيوعا
تجد الولد والبنت عندما تسألهما ليه عملتم كده؟
ترد عليك البنت
بكل بجاحة ولا مؤاخذة : احنا عارفين إننا ممكن نتجوز بعد كام سنة
بس أنا مش بقدر أعيش يوم من غير ما أشوف سيد
وفي نفس الوقت ستجد سيد يقول لك في تناحة منقطعة النظير: أنا عارف إني ممكن أتجوز ست أبوها! في خلال سنتين
بس مش حرام نضيع السنين دي من عمرنا في الهوا.. يرضيك كده؟
هو طبعا يرضيني
لسبب بسيط جدا هو أن العلاقة بين الولد والبنت إذا لم تنضج على نار هادئة
فإنها ستكون نيئة
قد تجد أول قضمة منها في غاية الطعامة واللذاذة
لكن بعد كده هتحس إنك بتاكل في لحم رخيص بس مش بتاع إيناس الدغيدي
مالهوش أي طعم
بعد وقت قليل جدا هتلاقي نفسك بتدور على نوع تاني.. وطعم تاني
حكمة هذه القصة: الذي يأتي سريعا يضيع سريعا.. هذا عن الفلوس.. فما بالك بالبني آدم؟
_________________________________________________
____________________________________________
الأهل رافضين
بابا حالف يطلق ماما لو اتجوزت سيد
لو كنت إخصائيا اجتماعيا ستجد ست أبوها تبكي بحرقة وهي تعترف لك قائلة: والله يا أستاذ حسونة أنا ماكنتش عاوزة أعمل كده
إهئ إهئ
بس سيد جه واتقدم ليا
وبابا راسه والف سيف إني ماتجوزش سيد
ماله سيد؟
وحش سيد؟
ده حتى جتة وملو هدومه
بابا طرده من البيت ورفض حتى إنه يكمل كلامه معاه وحلف بالطلاق إن سيد مايدخلش بيتنا تاني.. ليه كل ده؟
ماله سيد؟
وحش سيد؟
ده حتى كسيب وبيتاجر في الـ
في الـ.. يعني بيتاجر وخلاص
قد يحن قلب الأستاذ حسونة ويرق لـست أبوها ويقتنع بمنطقها
لكن دعونا نسأل ماذا لو كان لدى والد ست أبوها أسباب مقنعة حقا؟
ماذا لو كان سيد فعلا غير مناسب لها، أو أن الوالد يعرف عنه ما لا تعرفه هي؟
حكمة هذه القصة: رأي الأهل في الأغلب -إن لم يكن دائما- يكون على صواب.. حتى اسألوا ست أبوها__________________________________________
__________________________________
الظروف الاقتصادية
مافيش فلوس.. حتى اسألوا نجلا
كان سيد يجلس على قهوة احلى من الشرف مافيش
وهو يشد نفس من الجوزة ثم قال لصديقه اللدود عبده توكل: كح كح
تعرف يا عبده انا اتجوزت البت ست أبوها عرفي ليه؟
ما تقول لي ليه
ما تقول يا جدع ...!
آه نسيت إنك أخرس
أقول لك أنا ليه..
عشان مافيش فلوس..
هو احنا لاقيين نشرب الجوزة..
كح كح
لما نلاقي نجيب شبكة وعفش وشقة وكلام فارغ منه ده
وبعدين مش أنا لوحدي اللي باقول كده..
ده حتى الست المحترمة اللي اسمها نجلا غنت وقالت كده..
مش هي اللي قالت بح..
خلاص.. مافيش.. .شطبنا!.. أيوه هي كان قصدها على الفلوس.. مش مصدقني.. لأ.. أنا عارف هي قصدها على الفلوس مش أي حاجة تانية
حسنا.. يمكن ان نتعاطف مع سيد لو حاول أن يعمل وفشل.. لو وقف ضده العالم كله ووضعت لافتة سيد ممنوع من العمل في كل مكان يذهب إليه..
لو دققنا النظر..
سنجد سيد جتة وملو هدومه
وده كلام ست أبوها مش كلامنا
يعني ممكن لو سند بإيده على جدار يهده
صحة يعني..
طيب ليه يا سيد ماحاولتش تشتغل واكتفيت إنك تشغل نفسك وتشرب الشيشة وتتفرج على نجلا وخلاص
حكمة هذه القصة: شرب الشيشة.. ضار جدا بالصحة____________________________________________
_______________________________________
الأحد يوليو 26, 2009 7:40 pm
